Home Sport Agim Ademi: Futbolli ka bërë ura miqësie edhe me ato vendet që...

Agim Ademi: Futbolli ka bërë ura miqësie edhe me ato vendet që ende hezitojnë ta njohin pavarësinë e Kosovës


Kryetari i Federatës së Futbollit të Kosovës (FFK), Agim Ademi ka uruar të gjithë qytetarët e Kosovës për Ditën e Pavarësisë.

Sot më 17 shkurt bëhen 14 vjet nga shpallja e pavarësisë së Kosovës dhe kjo ditë e madhe nuk po lë pa u uruar nga të gjithë.

Një urim i tillë nuk kishte si të mungonte edhe nga i pari i futbollit të Kosovës, Agim Ademi.

Ademi ka lëshuar një urim me anë të faqes zyrtare të FFK-së, ku nuk ka lënë askënd pa e uruar për këtë ditë të shënuar dhe historike.

Urimi i Kryetarit të FFK-së për Ditën e Pavarësisë

Të nderuar krerë të institucioneve shtetërore,

Familje të heronjve e të dëshmorëve,

Invalidë, veteranë të luftës e veprimtarë të çëshjtes kombëtare;

Të dashur futbolliste e futbollistë, drejtues të klubeve, trajnerë, ish-udhëheqës të sportit, ish-futbollistë, gjyqtarë, anëtarë të FFK-së,

Dardanë e tifozë të klubeve, sponsorë e donatorë;

Të nderuar qytetarë të Republikës së Kosovës!

Me rastin e 17 Shkurtit – Ditës së Pavarësisë së Republikës së Kosovës, kam kënaqësinë e veçantë që në emrin tim dhe të KE të FFK-së të ju përcjell urimet më të mira për këtë datë historike, emocionale e krenarie për të gjithë shqiptarët kudo që jetojnë!

Kosova po vazhdon të rritet e të përparojë vit pas viti në çdo sferë, teksa në këto 14 vjet të shtetësisë pa dyshim sporti ka qenë ambasadori më i mirë, duke i thyer të gjitha barrierat dhe duke e prezantuar shtetin edhe atje ku nuk kanë mundur ta bëjnë fushat e tjera të shoqërisë.

Në këtë aspekt, futbolli jo vetëm që ka krijuar imazh të shkëlqyeshëm për vendin, por edhe është bërë urë miqësie edhe me ato vendet që ende hezitojnë ta njohin pavarësinë e shtetit tonë.

Besoj se edhe gjatë këtij viti sukseset tona nuk do të mungojnë dhe sporti, e futbolli në veçanti, do të vazhdojë ta bëjë krenar popullin dhe ta prezantojë shtetin tonë me dinjitet kudo në botë.

Urime 14 vjet shtet!

E gëzofshim për jetë e mot 17 Shkurtin!

Zoti e bekoftë popullin e Kosovës!

Zoti e bekoftë shtetin e Kosovës dhe miqtë e saj!

Me respekt,

Agim Ademi, president i FFK-së

/Telegrafi/