Home Bota Steinmeir: Nuk jam i mirëpritur në Kiev

Steinmeir: Nuk jam i mirëpritur në Kiev

Një këshilltar i Presidentit të Ukrainës, Volodymyr Zelensky, mohoi sot gjatë një interviste për CNN se Zelensky kishte refuzuar një vizitë të Presidentit të Gjermanisë Frank-Walter Steinmeir, siç ishte njoftuar nga gazeta Bild.

Presidentit gjerman tha dje se ai kishte në plan të shkonte sot në Kiev së bashku me presidentët e katër vendeve të tjera, Polonisë, Lituanisë, Letonisë dhe Estonisë, por nuk ishte i mirëpritur në Kiev, pas njoftimeve se presidenti Zelensky ishte kritik i të kaluarës së tij që vazhdimisht kishte mbështetur afrimin e Perëndimit me Rusinë.

Po ashtu presidenti gjerman kishte mbështetur edhe ndërtimin e gazsjellësit “Nord Stream 2”, që do të dyfishonte sasinë e gazit rus përmes një linje direkte për në Gjermani. Pas sulmit të Rusisë, Gjermania e anuloi projektin.

“Isha gati për vizitën, por më duhet ta pranoj, nuk isha i dëshiruar në Kiev”, tha zoti Steinmeir, pa dhënë detaje të tjera.

Pas sulmit të Rusisë dhe fotografive të shumta të dala në mediat sociale, ku shihet zoti Steinmeir duke u takuar miqëësisht me Ministrin e Jashtëm rus Sergei Lavrov, presidenti gjerman shprehu keqardhje për qëndrimin e tij në të kaluarën.

Ai tha se mbështetja e tij për gazsjellësin “Nord Strem 2” ishte gabim. Steinmeir, social-demokrat ka qënë minister i jashtëm në kohën e kancelares Angela Merkel, para se të zgjidhej president dhe e ka njohur Vladimir Putinin që nga viti 2001.

“Putini i vitit 2001, nuk ka asgjë të përbashkët me Putinin e vitit 2022, që është bërë një njeri brutal dhe luftënxitës”, tha zoti Steinmeir.